سوق النخاسة – شعر عامية
سوق النخاسة – شعر عامية
وحيد علي الجمال
مصمم عليك راح أكتب قصيدتي
تتوه المعاني وتهرب وتجري
وتظهر معاني تطيب في خاطري
تبدل آسايا وتحفظ وجعتي
وبعد انكساري تنور بصرتي
في حمى البداية بكهرب قريحتي
وتفضل سطوري تردد نصيحتي
صياغة الحكاية دليل التحدي
بترجع تحاول و تغزل و تجدل
بتلغي و تمسح وترجع تنقح
تكثف كأنك بتذبح تقطع
ولو حد شافها في لحظه بيشبع
لأنك سقيته خلاصة القصيدة
فأصبح بيشرب عسلها المصفى
بتنجح وتفشل وتفضل تمثل
وتمسك في مشهد لغيرك ممثل
وتحلف بأنه حقيقي مؤثر
و دور البطولة حجزته لنفسك
وطبعا هتخرج لنفسك تقسم
هتضحك تكشر وحرفك يفسر
في لحظة تجلي عيونك هتبكي
لحد الحقيقة ماتسكن في عشك
و تيجي الملايكة في لعبة تقوشك
كأن الرسالة بتنزل في وحيك
بتنهج كأنك بتجري في مكانك
فضلك يادوبك شوية ثواني
تكمل وتطبع ف اخر ديوانك
تفتش في نفسك لآخر حروفك
فتخرق سفينتك وتلعن ظروفك
فتحضن في مهرك ويفضل يبوسك
وهو الوحيد اللي خانك وداسك
فتغفر في ذنبه وترجع تحايله
كأن المهانة بتحفظ مقاسك
وايه اللي جبرك تعيش الدياثه
عشان اللي قبلك ماكانلوش كرامة
مصمم يحاربك بطهر العمامة
وهو اللي سارق جناح اليمامة
ونتف في ريشها وفصل بيجامة
ودمي اللي نازف عملك علامة
حبيبي المسافر طريق السلامة
كرامتك في جيبك فحافظ عليها
بيبان الوجاهة في سوقك شريها
وحتى التفاهة معزم عليها
فاتحلك سمايا ببابها الكبير
وصفحة جديدة بلون الضمير
تعيدي تزيدي في قلبي الكسيح
ومهما هتشرح هيفضل ضرير
يكون لك حقوق اختصامي المرير
وأشوفك بتحكم غيابي في أسير
دليلك ياصاحبي دا ناقص كتير
وضعف الأدلة كطوق الحرير
فلازم منابه في قلبك كبير
فتضرب قفايا وترضي الأمير
وراحة المنايا هترجع تدور
في دورك هتركب وساعة المرور
في دينك هتدفع ومهما تجور
هتيجي البشارة برد الحقوق
ماهو انت وصحابي عليكم قروض
وزهرة شبابي خنقها الحدود
و شمسك هتفضل تمطر وعود
وشابت ولادك في طلق الولادة
وباروا بكسدهم في سوق النخاسة
لا فضلوا بشرفهم يحاربوا النجاسة
ولا نفعوا حتي في فن الكياسة
………………………….
وحيد علي الجمال
