شبرا مصر – شعر عامية
شبرا مصر – شعر عامية
محمود عفيفي دومة
شجره كرسيماس . وهلال طالع ضيفوه الولاد بالليل
جابوه ف نص حارتنا وفرشلوا لكام منديل
وجامع فوق وتاج الروس يصد الريح معاند ميل
ماسك بحبل من عيسي وحبل تاني من موسي
وبلكونه عمنا محمد ع شباك خالة نوسة
وبخور وزهور مع مسك وطيب،
وعم هلال ف حضنة صليب وحالف إن ماعنه يغيب
ولو حاول شيطان أو جان
وصوت لآذان وبمب وطاخ داعب لودان
ويلا أفطر بحب يزيد ومتحدث وخير ف حارتنا ومكدس،
وألف تحيه يامولانا وسلام وسعيدة يامقدس
ورد الباب وماتربس ولادنا ف الليالي صاحين
مابين فرحه مابين ضحكة مابين قفشه وكام تكة
وجدي هناك علي الدكة بيتفرج. علي الواد ال بيغني
وعامل اسكتش بيهرج
بضحكه تبين السنة بصفا نيه مفيش إنه
مفيش من هم ماسيبها ع الله ياعم .
وده يقينه ويقلق ليه ماخير جاره ف مواعينه
ودقنه راكبة عكازه. وعليه ساندة عيونه لنومها بتآوح وليه معاندة يطول عمره. ماهو شايف حميده مسنده راندا
خطوط ف الوش مرسومة لنغمه برتم مقسومة
وراديوا والغنا لثومة وريحه لبصلة علي تومة
واهو جيلك واهي قومة ويحكي الحارة وأحوالها
يقولك بنت مين ديا ومين الام واخوالها
وبتعدي تهدي الخطوة وبتدي خد ياجدوا قرطاس حب علي ضحكة علي سوداني
ماحنا مقشرينلك لب عشان ليك درس وحداني
يروح فكره يسافر لبعيد ويلعن للفتن ويسب
شايف أجيال وبقوا خدموا وده جد وجداني ماهو ف عزوة وماوحداني محمد ف المدرسه مدرس وجرجس اهو بقي مهندس والوَاد ال عليه غلس
بيدرس طب ما ده اسامةال كان دايما عليه بيشب ولما يحب. يتمرجح ع رجله يهز يطب
ودي حارتنا. ويوم منها ويومها زي باقي سنينها
مفيش كلب يموت م الجوع ولاقطة وسمينها
عشان رحمه صحيح بحب اناالزحمة
وفسخاني وجنبه فرن افرنجي وفكهاني وده سايس ع لومنجي لكن طيب.
وفيه ألفه مفيش كلفة دي ناس حالفة برأس جدي تشيل عنك
ماهي منك وحتة غاليه م الحارة
ده ناس كمل وليها أصول مفيش من صول دخل غارة
ومفيش غير ود. وساعه الجد تشوف لشهامه وامارة
ودندرمة وزمارة وغزل بنات ع اشارة
وزغروطة ليها بشارة تقول حاسب
هنا مصنع رجال طيبة مفيش غيبة. مفيش عيبة هنا الهيبة
ومفيش للود من وسطي وكل العالي ليه باسطة وعايشه الناس ومنبسطة مابين دوقة ومابين زوقة حاضنه لطبقة م الوسطي
ولاد بلدي صحاب قيمة ليهم ف الحب شعبية ببدله جنبها صديري مشاركه لاسة وجلابية
وده جاري ودي جارتي ولقطة بسيطة من حارتي
وابيض, واسود الصورة وليا زمااااااان. وكات صورتي!!!
