شمندي!!! – شعر عامية
شمندي!!! – شعر عامية
محمود عفيفي دومة

ياشمندي يابن عمي لسه صورتك بالسلاح
صيحة كانت الله اكبر حي حي ع الفلاح
وانت قاطف الفجر عنوه تجبره يجي الصباح
والخضار يطرح سنابل
للعدو تجري تحشه فوق راسه دب القنابل
العمار ساكن في صدرك ماهيبت موتك لو مقابل
كات قلوبنا هناك تبارك وكات عناية الله تشارك
وانت ذكر الله ماتارك كات بتضوي هناك في بابل
لسه صورتك ف الخيال مهما بتعدي السنين
صورة تحكي لكفاحك كتف شايل لسلاحك ارض تقابلها بحنين
والقدم ف الرمل غارز كان سيفك فارس مبارز. واحنا ندعي نقول آمين
ربنا ياخد بيدك. ربنا يرفع راياتك كان دعانا بنصر ترجع ربنا مكلل غاياتك.
زحت غمة نصرت امة وحش طالع م العرين
ياشمندي يابن عمي يابن كل الطيبين
بس حالا كأن شايفك وانت رافع للعلم
والعدو مرعوب وخايفك محتار في وصفك القلم والنسيج رسمك خيطان
ياشمندي يابن عمي لسه صورتك ع الحيطان
تسعد النظرة بطلة كات تخضر للغيطان
كنت للشباب تزينهم وكات اماني يارتني بينهم. همة ف وسط الهمم
بس كنت صغير وانت قمة فوق كل القمم
كنت بتسطر لقصة كات تعلم الأمم
اوعي تفتكر ان ناسي وانت بتعدي القنا
كنت واعي وكنت راسي ولو تعدي كام سنة
كنت بضحي بروحك وتشتري لروحي انا
وانت هادد كل ساتر كنت سيف مقدام وباتر. انت واخواتك الشداد
عبـعاطي ومعاه محمد وكتف بطرس ويا جاد
نادية كات هناك تمرض والدكتورة كات سعاد
السعادة أنتم سببها فرحة عمت كل دار
بعد دوسكم ارض سينا والفرح زاح أنكسار
فجرنا علي الدنيا طل جاب في يده انتصار
يا بطل .ياابن الفوارس للشهامة كنت وارث
كنت فوق هناك محلق نسر قاهر للنوارس
واد بطل و الصورة عندي
حتة مني يا شمندي
وابراهيم في وسط النار