شوية جنان – شعر عامية
شوية جنان – شعر عامية
وحيد علي الجمال

سافرت لمدينة في قلب المحافظة … وكانت حزينة وبرضُك محافظة
وراكب حمارة عليه محافظة … وسرّي معاها تغلب محافظة
غبطها في سفري قلبتُه لحافظة … وجدول حياتي وغرضي ومرادي
بتقرا دماغي وتعمل مكاشفة … في زحمة بتمشي وتلمح بـرمشي
بتعرف تسرّع وتعرف ته الدّي … لا بدفع إتاوة ولا حتى أُجرة
وعامل لنفسي حماية وسُترة … بكلمها دايماً وتسمع في عزة
بشاورها دايماً تشد ف عزيمتي … ومهما اتخانقنا بتيجي تصالحني
ودايماً معاها مافيش أي حاجز … ودايماً تفكر تكتّر في راحتي
لمحتك لحقتك وكانت في سيرتك … حبيبتي اللي عاشقك ما تيجي يا سيتي
نسوّي اللي بينا وننهي الخلاف … هجيبلك عشانك صينية خشاف
وممكن وعادي تنطي ورايا … ونفضل نحكي ونضحك ونبكي
فصرخت في وشي: “يا حظي الهباب! … صبرت ونولت خطيبي وحظي؟
عبيط بالوراثة وراكب حمارة … كأنه هيغزو جُيوش التتار!”
وضاقت حروفي بلعنة ظروفي … خنقني ضميري فسبت اللجام
كتبت القصيدة وبعدك ديوان … تعبتك وفجأة حصلي انفصام
وفارت دماغي بظُلم الصداع … ربطت الحمارة معاها المتاع
وقولت أما أجيبلي شوية بتاع … لقيت الحرامي سرقها وسابني
في وسط الشوارع بعاني الضياع … خدوني بسرعة لطمت الخدود
وقهرة حروفي قتلها الجنود … شالوني ما بينهم بحضن الرصيف
في عز المصيبة حاسسني خفيف … جابولي كاكولا وشقة رغيف
وبعد اللي شفته حصلي انهيار … وكتروا اللي شافوا عصير المرار
وفاتت ساعاتُ تجرّ الساعات … كأني بـلحظة وصول المَمات
وهمشي لنهايتي بجرّ السُكات … فطبطب عليا غريب الصفات
أخذني لوحده بدون أي شات … وقال إيه عزمني عشان البنات
يُستر يُكبر في سكر نبات … عزمني في مطعم عجيب المكان
تشم في ريحته يجيلك زكام … وشكل اللي قاعد يودي اللِمان
كأنه بيطبخ في لحمة حمير … وشامم نجاسة جلود الكلاب
وقلبي وكلني بظني الهباب … وعاوز يقولي بحس العناد:
“ده هوّه الحرامي ورب العباد!” … سألته وسابت مفاصل الشباب:
“دا لحم الحُمارة بحق الكتاب؟” … بربك جاوبني.. فـقال لي: “حُمارتك
سواها بياخد شوية ساعات … وكل اللي كلته دا لحم الكلاب!”