عدت سنين – شعر عامية
عدت سنين – شعر عامية
اشرف الشناوي شاعر عاميه البرامون – المنصوره
الي امي النائمه في قبرها
عدت سنين
يامه معرفش كام
بس انا شايفك
زي ماكنتي
وحافظ ضحكتك
حتى الكلام
لما كان الصبح يطلع
كنت اشوف الشمس
في عيونك تمام
كنت باسمع
صوت ترانيمك
في الصلا
كنت باجري جنب
منك وابتسم زيك أوام
والقى ضي من السما
نازل فوق جبينك
يملا دارنا بالسلام
كنتي زي النيل
بيجري في الغيطان
يملا شق الأرض ميه
تصحي فوق كفه
العيدان
كان لصوتك نبره حلوه
زي بالظبط الادان
كنت احس
بمتعه جامده
لما فوق حجرك بانام
كنت احس بضل توته
لمه بكفوفها الحمام
ايوا مشتقلك بجد
نفسي بس
في كاس حنان
الحياه من غير وجودك
ماسخه جدا
صعب فيها الاحتمال
كل يامه ماتطير واغني
بالقي قلبي مكتفه
الشوق بالحبال
واما اجيلك
بانسي وجعي
وابتسم رغم الالام
ايوا يامه سنين وعدت
بس صورتك لسه واضحه
بس ينقصها الكلام
…………………
