عيدان كبريت – شعر عامية
عيدان كبريت – شعر عامية
وحيد علي الجمال
أنا امبارح مشيت نايم
وطيرت كمان وأنا عايم
ولما الجوع عَصَر بطني
كدبت وقلت أنا صايم
لا أنا ساحر ولا مجنون
ولا شارب عشان أسطول
وابعد مِ اللي تتخيل
عن الكرامات
أنا مديون
وحرفي إن طلع مني
عليه مسؤول
أنا لسه مجاش زمني
ومش مكتوبه أيامي
في أي فصول
ومنشورة قصايدي هناك
ومصلوبة كده بالطول
سليم القصد والنيه
مانيش مهبول
سألت الناس على حظي
قالوا حظك يا واد مقتول
وكان سايب هنا وصيه
وشنطه فيها جِنِّيَه
وحلم كبير بيتمرجح
مابين الشط والميه
وصُورة كتير بتشبهلك
ومجموعة من التجاعيد
وجرح قديم وكام كلمة
وشِعر حزين من الماضي
ونار طارحة على عينيها
عيدان كبريت
وتعويذة بتحكي غربتك فيها
وملفوفه كما العفريت
ومكتوبلك على الهامش
بلاش تبقى على الهامش
في قلب حبيب
يا تبقى كل أحلامه
يا إما تغيب
ولو جرحك لمس قلبه
بسرعه يطيب
حذاري يا واد يكون بينكم
حدود وسدود
حذاري يكون مابينكم كسر
مافيش في الدنيا حب يدوم
في قلب جروح فضحها النشر
