في حب أبويا – شعر عامية
في حب أبويا – شعر عامية
نصر عبد العزيز طاحون

باحبك يا أبويا وشايفك مثال
لكل المعاني وأعلى الخصال
ومهما تمر الليالي الطوال
باحبك وشايفك جبل من الجبال
باحبك ونفسي أَحِس بأمان
وحِسَك وصُوتك بيمْلُوا المكان
بتحكي الحكاية وسيرة الزمان
خلاصة المسيرة بحكمة وحنان
باحبك يا أبويا وعاشق خُطاك
وفاكر كلامَك وحافظ ضِياك
تنَوٌَر طريقى وأدُوْر في فَلاك
وتاخد بإيدي كَأنَّك مَلاك
باحبك وشايفك في حِلمي الجَميل
تِجِيلي تُقولي سايِبلك دليل
على حُب ناسَك وأهلك أَصيل
وعَنهُم ما ترضَى يا نَصر ب بديل
خِواتَك تاخُدهُم في ضَي عِنيك
تحاوط عليهم تَمللِّى بإيديك
وتحفظ جَنابهم بكل ما فيك
دا مالهومش غيرك وغيرهم ما ليك
باحبك وعَايز أشوفك يا طَيِِب
وأنام مرة جَنبك وقلبك قُرَيِّب
وتمسح دموعي وخَدِّي تِطَيِّبْ
ويجمعني حضنك وحُضنك ما خَيِّب
باحبك وماشي أحِن لهَواك
وأحِن لشارع رَويتُه بخطاك
وأشِم العبير اللي فاح من رُباك
وأعِد النجوم اللي زَانِت سَماك
أَتارِى حياتي بدونك سَراب
وصُوتي بيعزف بنار العذاب
وشَمسي اللي طِلعت طَفاها الغياب
وضِلِّي اللي قايم ترَنَّح و دَاب
باحبك يا عبده يا عبد العزيز
وحُبك في قلبي تحِسُه لذيذ
حلاوة البغاشة وحَب العزيز
ماتِقدَر تنافسه ولو من باريز