لما تطلع عالمنصه – شعر عامية
لما تطلع عالمنصه – شعر عامية
اشرف الشناوي
شاعر عاميه
البرامون
المنصوره
هو لازم تبقي شاعر
بالشعر الطويل والمنعكش
والا بالكاب المطربش
والا تطلع يعني عالمسرح
منشي
والا تتنطط وترقص
لجل ماتعجب سيادتك
أو تمط في الكلام
أو تسيب الناس تنام
الشعر ياساده احترام
كلمه ليها الف معنى
زي توته ضلها
تحته اجتمعنا
روح تصحي كل شئ
مات… جوا منا
زي بالظبط الاجنه
نازله وبتوب البراءه
تبدر الأرض بخضار
تسقي غيط العطشانين
تطفي لهفة مشتاقين
تخطف الاوجاع وتزرع
الف حلم في الف دار
تبقي ساعة الظلم نار
الكلام زي الرصاص
لو مصابش يبقى عار
لما تطلع عالمنصه
خلي شعرك يبقى قصه
يبقى صوره م الحقيقه
م اللي داير… انت مش
درويش طريقه
انت في الاصل المرايه
بس بتزوق وترسم
كل فصل من الروايه
……………………..