مابين القلب والضحكه – شعر عامية
مابين القلب والضحكه – شعر عامية
اشرف الشناوي
شاعر عاميه
البرامون
المنصوره
انا من بره غير جوا
وروحي بتحبي بالقوه
وحلمي يوماتي يتوضا
وبيصلي مع الدراويش
ونفسي اعيش
واكمل لو نهار واضح
وبرسم ليلى بالحواديت
واهز في قلبي واستني
امل مركون
واقول يمكن الاقي النور
واشوف الحلم م العتمه
بيعدي السور
والم ملامحي م السكه
وانام مستور
مابين القلب والضحكه
وتر مكسور
والف واداري في جراحي
وبكمرها ببن وشاش
والاقي الفجر متحمل
على الإنعاش
وصبح بيجري في الضلمه
كأنه مجاش
ألم الباقي من عمري
واعيش به طشاش
وازق في قلبي واتكا
عشان مايدور
ويكمل حتى بالعافيه
ويسقي البور
ويبدر في الغيطان غنوه
وحبة نور
ويعمل م الوجع سكه
لكام عصفور ……………….
