مركون عالرف – شعر عامية
مركون عالرف – شعر عامية
اشرف الشناوي شاعر عاميه البرامون – المنصوره
مركون عالرف
ياقلبي في صف
مالوش تواريخ
عمال بتغني
ماحدش سامعك
وكأنك عايش في المريخ
عمال بتهز في شجر التوت
واحلامك غصبن عنك
ايوا يوماتي تموت
وبتضحك من غير نفس
كأن الضحكه بتاعتك
من غير صوت
بتلم في عمرك
وانت بتجري ازاي
كان نفسك تقعد حبه
تحس بطعم الشاي
أو ترسم حتى ملامح وشك
من غير روح
وازاي هاتكمل سكه
في عز العتمه
وايديك مافيهاش ولا
حبة نور
وازاي من غير جناحات
هتعدي السور
ماانت اللي اخترت
تعيش وتموت عصفور
مستني الفجر ولسه ماجاش
والصبح يادوب بيعدي
تشوفه طشاش
والليل بيلم غناوي الخلق
ويلعب بيها
يلضهما ويفضل صاحي
يسبح بيها
ولحد الشمس ماتطلع
ترمي كفوفها على الاحزان
وتدفي الحلم اللي انت
رسمته على الجدران
هاتكمل غصبن عنك
مهما تكون
انسان
……………………….
