نور و سلام – الي امي النائمه في قبرها – شعر عامية
نور و سلام – الي امي النائمه في قبرها – شعر عامية
اشرف الشناوي
شاعر عاميه
البرامون
المنصوره

ايام بتمر وتجري أوام
وملامحك زي ماهي
النور وسلام
وبحس بروحك جوا عروقي
فينطق قلبي بأحلى كلام
مين قال الموت بيفرق
يوم عشاق
بالعكس دا كل
ماتبعد بينا السكه اشتاق
وباشوفك زي ماكنتي المركب
وسط الموج شايلاني
وايديكي الدفا
مليانه بشوق وأماني
وبشم ربيع العالم كله
وقلبي ينط ويملا الدنيا اغاني
اما انتي تعدي وتضحكي
بس في وشي ثواني
انا كنت باتوه عن حجرك
لكن بارجع ليه والقاني
فياخدني الحب كأني
بدأت هواك من تاني
وارقص واطير زي العصافير
عالتوته اللي انتي
فردتي فروعها عشاني
ايام بتمر وعمر بيكر
وانا واقف لسه
بلم في باقي العمر التاني
وارسم احلام جوا الايام
واسافر وارجع تاني مكاني
علشان ما عيونك لسه
بتضحك دايما
ومحوطاني
……………………….