وبتعمليها إزاي؟ – شعر عامية
وبتعمليها إزاي؟ – شعر عامية
وحيد علي الجمال
غَمَّسْتِ فيكي الصبر
بِحِفانْ رضا عَ القد،
وقلت: بكرة الصد
يطرح جناين وُد،
ويموت في حضن البرد
غضبي اللي كان مِشْتَد.
أنا عشقي ليكي بجد،
مهما البيبان ترتد،
ماسك حروف المد،
وبحارب المرتد.
ولو هقيم الحد
على نفسي.. و أرضيكي.
شديت حزام عَ البطن،
يكفيني منك حضن،
يا مرضعاني الحزن
ليكي الدموع بتحن،
أبعد.. روحي تئن،
ملبوس في عشقك جن
يسهر في ليلي يزن،
يسرق في أحلامي.
طمعوا العبيد فيكي،
باعوا مراسيكي
سيدهم حكم فيكي،
والوعد يغنيكي،
من عيني برقيكي،
أتاريه معرّيكي،
باع واشترى فيكي
لحمك رافض يتلم.
سمّوا العبيد سادة،
قلبوا الوطن غابة
ذلونا بزيادة،
والدنيا غلابة.
مافيش في صلبك حر؟
يشرب عصير المر،
يسجد في محرابك،
يستقوى بترابك.
لو كفنوكي بجد،
هنبش جدار القبر،
واسقي القصايد حبر
من دمي وأرويكي،
