ومن غير لازمه – شعر عامية

انا لسه نازل للحياه
باصرخ واعيط
من ضلمه نازل
وسط خلق بيضحكوا
وفي دنيا واسعه سمعتهم
بيقولوا بكره هايشقي
ويعافر ويسعى
ردت عليهم ستهم
ماهو ابن تسعه
…………. ……….

نزلت باصص عالوشوش
ماهو شئ غريب
معقول اكون يوم زيهم
تعلب ياديب
………. ……………

فيه ايد شالتني
وقلب دق وقالوا ابوك
نفس الحواجب والعيون
والباقي مش عارفين لمين
يمكن لجده أو لسته
وكلهم متلخبطين
………… …………….

وصرخت قالوا
الواد جعان
ناولوني بز ملان لبن
على كوم حنان
الرزق جاي من غير تعب
من غير سنان

…………… ………….

لفوني قالوا
سيبوه ينام
ماهي لسه ساعته
ماهش تمام
حبه بكا وحبة جنان
بكره عوده هاينصلب
ويتمنى لو حبة
امان
…………. …………..؛.

حطوني في سرير
م الحرير
رشوا ملح وملبس
كتير
ولعوا تحتي البخور
عملوا زينه كتير ونور
كنت سامع همسهم
بس معرفتش اطير
…………. ……………..

وكبرت يعني هبابه
مكنتش اعرف
ان انا نازل في غابه
واللي ضحكوا
يوم ولادتي
كلهم طلعم ديابه
لو خيروني كنت
هافضل وفي مكاني
طب رجعوني لو ثواني
يمكن القى في بطن امي
حلم تاني
………… …………..

وكبرت واشتد عودي
ومسكت حلمي بايد
والتانيه كان فيها عودي
بصيت على الدنيا الغريبه
عرق ودموع
دول هما الضريبه
ضحكت جدا عاللي حاصل
وان انا لما اتولدت
كانت دي هي النصيبه
……….. ……………
ومشيت كتير في السكك
شويه المح نور وشويه
اخش في سور
وشويه انام عالدكك
وشويه اطير في السما وشويه
اطلع في الشبك
مش عارف انا عصفور
والا نوع من انواع السمك
………….. ……………

مابين البيوت والدووور
طاير كما العصفور
في براح كبير
خايف ومرعوب من العتمه
واداري جرحي بغنا
واقفل بمية لازمه
واخاف لايجي الشتا
ملقاش في يوم جذمه
استني فجر وامل
ياخدوني م الازمه
وباحس روحي انطفت
ولا حلمي ليه لازمه
………….. …………..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى