يا فجر يا طالع – شعر عامية

يا فجر يا طالع – شعر عامية

اشرف الشناوي
شاعر عاميه
البرامون
المنصوره

يافجر ياطالع
فين الادان قولي………..

ياماسكين القلع
والمجداف
بالله عليكم قلبي
بيرتجف ويخاف
دي بهيه مالها
في الدلع اوصاف
يازارعين القمح
في الغيط الوفي
دا انا قلبي عاشق
والخل الوفي
فين الغنا والحلم
بادئ يختفي
يانيل يافارد
عالوطن دراعات
ماتقولي فين ضحكتك
ليه نشفت الزرعات
ومالت على جنبها
من حزنها الزلعات
يافلاحين
الغيطان زاد البكا فيها
ليه سيبتوا البوار
يرمح ويسقيها
الأرض نشفت
من بكا عينيها
ياايدين براها
الشقا متشققا
م المسحه والمنجل
فايته الغيطان كلها
للمر والحنضل
والشمس من قهرها
لبست زيكم سندل
يافجر ياطالع
فين الادان قولي
فين الصبايا بالكحل
والتوللي
والحنه زاينه الكعاب
والعود قوام فلي
ياصبح فين ضحكتك
م الحزن مطفيه
دا البحر هايج وفايض
وزايد عالشطوط ميه
ولا حد سامع غنا
ولا صوت مراكبيه
ياليل يالامم بالوجع
مجاريح
بتلم منا الغنا
وتسيبنا جوا الريح
وقلوبنا وفي سبحتك
وتعبنا م التسبيح
لا شوفنا مره الامل
ولا حد فينا مسيح
ولا موسى جيه
بالعصا
ولا فجر بالتواشيح
…………………