يدوم عز الوجع والجوع – شعر عامية

يدوم عز الوجع والجوع – شعر عامية

اشرف الشناوي
شاعر عاميه
البرامون
المنصوره

يدوم عز الوجع
والجوع
يدوم الجرح
شارب م العيون دي
دموع
يدوم بكره اللي
دايب شوق
يدوم الفجر سجن
وطوق
يدوم الغنا والتباريح
يدوم الحلم زي الريح
يدوم قلبي
اللي سك الباب
وقال توبه وجع وعذاب
يدوم الليل ملان ترابيس
وكام نجمه من المهاويس
يدوم يزعق
في روحنا البوم
ننام نحلم بضحكه تكون
امل طارح في أرض الشوم
تدوم السكه معووجه
يدوم الصبح متكتف
ومتستف وجع وجراح
تدوم الشمس محبوسه
لا بتدفي الحيطان م البرد
ولا بتسرج في يوم قنديل
يدوم البدر طافي النور
نفوق م الدوخه
نلقي السور
ننام نحلم ونتغطي
نلاقي القطر في محطه
ملانه بخلق تتوضي
بملح ودم
فنقعد عالرصيف نسمع
غنا ومواويل
لناس بتهز وتغربل
في هم تقيل
ومستنيه القبور تفتح
بيبان الضي
هناك يمكن يلاقوا
الحلم متعمم ولساه حي
………………….