تفاصيل – شعر عامية
تفاصيل – شعر عامية
بقلم دكتور نصر عبد العزيز طاحون
تفاصيل كتيرة تشبهِك
تصادفني في السِكة
فوق الشجر طَلِّتِك
ومعاها كام ضِحكة
والضحكة برد وشفا
تفتح بيبان عكَا
الغُصن مَال وانحني
وهمس لي بوجودِك
هفهف نسيم اللُقا
فَكَرنِّي بجفونِك
لمَّا الرموش ارٍتَخِت
خافت على عُيونِك
قفلت بِيبَان الهوا
حِلْفت ما هاتْخُونِك
زِعِل الشجر وانْزَوَى
يبكى ويتنَهّد
كان أمله في حُبنا
فوق ظهره يتخلِّد
قَلْب وحروف اسمنا
والسَهم سي السيد
جَمَّعْت أنا دمعِتُه
وكتبتلِك مِرسَال
على جذعُه اللي اتكَوَى
والخد كان سَيَّال
رَقْ الفؤاد م البُكا
واتاريه يا عين مَيَّال
نَط في بِساط الريح
وبسرعة عاد لي ومال
قالي أنا ويَّاك
و هاكون معاك رَحَّال
سَرَح الخيال مِننا
فطْلِعنا ع الجَنة
ولْبِسنا توب الهَنا
مِتغَطِي بالحِنة
وشربنا شَهد المُنى
وكأننا كنَّا
كنَّا في عُرْس وفَرح
حوالينا أحبابنا
والليل يناجي القمر
ويقوله يِستَنَّى
لاجل الهوى يِرتِوي
من خمر عُوّادنا
عُوَادنا جابوا الربيع
والزهر يتفتَّح
رقصت قلوب الحور
والفرحة تتمرجَّح
والكون كأنه ف عيد
وغرامنا يتفسَّح
نامت جُفون العين
شبعانة بتسبَّح